Mae Grŵp Rondo Media yn un o brif grwpiau cynhyrchu creadigol Cymru, gan ddod â Rondo Media, Yeti Television, Galactig a Stiwdio Ffilmiau Aria ynghyd o dan un weledigaeth greadigol. Gyda’i gilydd, mae ein cwmnïau’n cyfuno rhagoriaeth mewn adrodd straeon ac arbenigedd technegol ac rydym yn ymfalchio yn ein cysylltiad dwfn â diwylliant Cymru a’n perthynas glos gyda phobl a chymunedau ar hyd a lled Cymru.
O’n canolfannau ledled y wlad, rydym yn cynhyrchu dramâu, rhaglenni ffeithiol, adloniant, chwaraeon a chynnwys digidol sydd wedi ennill llu o wobrau, ar gyfer darlledwyr mawr yn y DU ac yn rhyngwladol. Mae ein gwaith yn adlewyrchu’r creadigrwydd a’r uchelgais sy’n gosod talent Cymru ar lwyfan y byd.
Mae gan bob cwmni o fewn y grŵp ei gryfder a’i hunaniaeth unigryw. Mae Rondo Media yn adnabyddus am gynhyrchu cyfresi drama poblogaidd, rhaglenni dogfen safonol, cynnwys chwaraeon pell-gyrhaeddol a digwyddiadau cerddorol ar raddfa eang, yn ogystal â chynnwys crefyddol sydd â dilyniant cryf gan gynulleidfaoedd yng Nghymru. Mae Yeti Television yn arbenigo mewn cynnwys ffeithiol a rhaglenni di-sgript sy’n cysylltu’n uniongyrchol â chynulleidfaoedd. Mae Galactig yn arwain ym maes cynnwys digidol ac ymgysylltu creadigol ar draws llwyfannau modern. Ar Ynys Môn, mae Stiwdios Ffilm Aria yn darparu cyfleusterau cynhyrchu o safon ryngwladol - o gyfresi teledu safonol i gynyrchiadau ffilm mawr Hollywood.
Gyda’i gilydd, mae’r grŵp yn ffurfio ecosystem gynhyrchu gyflawn; o ddatblygu syniadau a chreu straeon, i gynhyrchu mewn stiwdio ac arloesi digidol gan greu grym creadigol unigryw o fewn diwydiant sgrin Cymru, y DU a thu hwnt.

Sefydlwyd Rondo Media yn 2008 gyda gweledigaeth feiddgar i adrodd straeon rhagorol, o bwys. Heddiw, mae’r cwmni’n un o gwmnïau cynhyrchu mwya’ Cymru gyda chanolfannau yng Nghaerdydd, Caernarfon ac Ynys Môn.

Mae ein gwaith yn cwmpasu ystod gyfoethog o gynyrchiadau, gan gynnwys brandiau poblogaidd fel y gyfres bêl-droed Sgorio, y gyfres sebon Rownd a Rownd, y gyfres wythnosol aml-ffydd Dechrau Canu Dechrau Canmol, a’r gyfres ddrama afaelgar Bariau.

Rydym yn falch iawn o’n rhaglenni ffeithiol arbenigol nodedig yn cynnwys Stori’r Iaith (S4C); Seren Jones: Yn Fyw yn y Dŵr (S4C), Siân Phillips at 90 (S4C + BBC), Paid â Dweud Hoyw / Don’t Say Gay (S4C), a Two Sisters: One Goal (BBC).

Rydym yn cydweithio â rhai o’r crewyr cynnwys gorau yn y byd i ddatblygu a chyd-gynhyrchu cyfresi dogfen rhyngwladol dylanwadol, fel y gyfres Y Wal The Wall / An Balla / Am Balla (S4C, TG4, MG Alba gyda chefnogaeth Cymru Greadigol ac wedi’i dosbarthu gan Cineflix). Mae Y Wal yn gyd-gynhyrchiad uchelgeisiol a ffilmiwyd gyda thri chyflwynydd mewn tair iaith wahanol, ac wedi’i leisio yn Saesneg gan Matthew Rhys.

Mae hyfforddi a datblygu sgiliau yn ganolog i’n cenhadaeth, ac mae adeiladu dyfodol bywiog a medrus i gyfryngau Cymru yn rhan bwysig o’r weledigaeth hon. Wedi’i wneud yng Nghymru, wedi’i leoli yng Nghymru, ac yn falch o hynny.
Yn Rondo, mae creadigrwydd, ymddiriedaeth a chydweithio yn llywio’r ffordd rydym yn gweithio. Rydym yn falch o fod yn gwmni cynhwysol ac arloesol sy’n edrych tua’r dyfodol, yn hyrwyddo amrywiaeth, yn cefnogi lleisiau newydd, ac yn creu cyfleoedd i dalent o bob cefndir.