Hogyn newydd golygus yn cyrraedd i flwyddyn 12 yn yr ysgol. Mae o’n gyrru car (wedi cael ei ben-blwydd yn 17 ddechra mis Medi), yn gefnog, yn hyderus, ac yn cool. Mae ganddo berthynas dda gyda’i dad, Llyr a’r ddau’n dipyn o ffrindia’.

Mae Efan a Ioan ei frawd bach, yn cael eu sbwylio gan Llyr yn rhannol oherwydd absenoldeb y fam. Mae’n haws rhoi prês/ anrhegion iddyn nhw i’w cadw’n hapus.

Mae o’n mwynhau chwaraeon a’n gapten tim pel-droed Gwynedd a’n dipyn o arwr i Robbie ac Owain (fydd yn yr un flwyddyn â fo). Mi fydd cyfle i ni ei weld o yn yr Iard Gychod yn achlysurol yn rhentu kayaks ac ati. Maes o law mi fydd o’n dechrau perthynas hefo merch yn yr ysgol. Er iddi hi, ar y dechrau, feddwl fod o’n dangos ei hun mae’r gwrthdaro a’r “banter” rhyngddynt yn ysgafn – cicio a brathu!

Yn yr ysgol mae o’n ddisgybl B/C a byth yn trio’n galed iawn i gael marciau cymhedrol. Mi fydd hyn yn destun rhwystredigaeth i’w athrawon ond mae Llyr yn meddwl bod petha pwysicach na stydio.

Hen sinach bach slei, dan dîn ydi Ioan. Mae o’n hunanol ac wedi cael ei sbwylio. Mae o’n dipyn o fabi mam hefyd, ac mae ei habsenoldeb wedi cael effaith mawr, andwyol arno. Mae’n ei cholli hi’n ofnadwy ac yn methu cyfathrebu gyda’i dad i’r ‘run graddau ag yr oedd gyda’i fam. Mae’n edrych ymlaen at mynd i ymweld â’i fam er ei fod yn brofiad trawmatig iddo. Ar ôl dod adref wedi bod yn ymweld â hi, mae o’n cael cyfnodau hir o fod yn fewnblyg a distaw ac mae’n anodd i neb ei dynnu o’i gragen. Mae o’n agosach at ei frawd nag ydio at ei dad ac mae’n cyfri Efan yn dipyn o arwr.

Mae o’n treulio llawer o’i amser rhydd yn ei ystafell wely yn darllen, gwrando ar gerddoriaeth ac yn chwarae gêmau cyfrifiadurol. Mae ganddo ddiddordeb mawr mewn ffuglen wyddonol. ‘Does ganddo fawr o ddiddordeb mewn chwaraeon, ond mae’n alluog yn academaidd ond yn ddi-daro a diog ynglŷn â chwblhau gwaith a gwaith cartref.